Yettie Silencer

Hütt bini grad verschrogge, woni inere Bäckerei z'Winterthur ha welle Gipfeli poschte. Zfordertscht uf der Theke sinn doch wirggligg Faschtewaie glääge. I ha grad miesse kauffe derfo aber trotzdäm hett's mi Wunder gnoh, worum ich do in dere Bäckerei, witt ewägg vo Basel überhaupt Faschtewaie find ? D'Verkäuferin hett mich denne ufgkläärt und hett mer gseit, dass d'Cheffin halt us Basel nach Winterthur gkho isch. E guete Zug vo dr Cheffin, in Winterthur go Faschtewaie mache. Eso hani jetzt au no bitz Basel gfunde.

Am 01.02.2009 simmer (es sind mehreri gsi dasmol) nach Arni go Schneeschuehlauffe. Womer in Intschi uf's Seilbähnli hänn welle, hett's gheisse, es heig z'viel Föhn und s'Bähnli würd nid fahre. Do simmer abe uf's andere Bähnli und lueg au do, das isch gfahre. Me hett nur miesse telifoniere und iistige und scho isches losgfahre. Obe aacho, hett's scho bitz gchuttet und ich ha glaubs bitz z'wenig Chleider mitgnoh. womer denn loszottlet sind, isch mer denn bald warm worde und hett meh Spass gmacht. Mer sinn denne ufwärts und denn umme See zur Beiz gschuenet. Dert hämmer e feins Mittagässe gnosse und sinn denn wieder ab. Zrugg isches scho lang abe gange und mer hänn dänggt, dass mer falsch wäre. Aber dr Plan hett gmeit, dass mer uf der richtige Richtig seige und es isch denn au so gsi. D'Gegend isch zauberhaft schön gsi und mer hetti no meh Möglichkeite gha zum Schneeschuehlauffe. Doch well's eso gruusig ghudlet hett, hämmer uns entschiede, nid z'witt ummenander z'lauffe. So simmer halt scho am 4ri abwärts gondlet und heimeszue.