Ausflug in die Sackgasse
Hütt hani eigentlich öppis anders welle, als ich wirklich unternoh ha. Aber ich verzell jetzt lieber, was ich unternoh ha, als dass ich verzell, was ich ha welle mache ...
Also ich bi mit em Velo losgfahre und bi duruf gfahre, ha amigs au gschobe und bi immer witers duruf, bis es nümm witers gange isch. Ich bi ganz eleige gsi und ha niemerts gseh und bi mer vorcho, wie der einzig Mensch uf Ärde, wo no s'Abentüür suecht. Das bimer jo au gwohnt, ganz eleige z'sii. Wer will au so verruggti Sache unterneh wien ich's mach. Uf alli Fäll bini dert ane gsässe und ha denne Z'Mittag g'ässe. Nochher hani no e bitz d'Natur und die unendlich Stilli gnosse, bis i wieder abeszue gfahre bi uf dere Schotterstroos. Öppe in dr Helfti bini doch no uf drei Männer gstosse, wo so immene Couloir nach Krsitall gsuecht hänn. Dr eint hett Glück gha und hett mer e Kristall zeigt, woner uf em Wäg duruf gfunde hett. Sie hänn no witers uffe welle, go die Bergwerk sueche, wo me früehner emoll Gold oder Pyrit gfunde hett. In däm Fall gitt's no me Spinner als ich eine bi. Nach dem glaine Wortwächsel bin ich denn durab und die drei sind witers duruf.
Die Unternähmig isch nid eso lang gange, wie anderi Unternähmige. Drum bini au gly wieder diheim gsi. Irgendwie bini doch müed gsi und ha am Nommittag no bitz pfuust ufem Sitzsagg ...
