twoo an der Mustermesse Basel
Samschtig, 13.02.2010, e Daag in Basel !
Hütt bini nach Basel abe gfahre, mit em Zug nadiirligg, mit was au susch ... :D OK, ich hätt au mit em Töff chönne abe fahre, denn wär ich aber wienes Iiiszäpfli aacho. Also bini mit em Zug nach Basel, obwohl mer in Ziiri scho halber schlächt gsi isch vor lutter Wermi in däm Zug. Am halber Zähni isch denn dr Alex no z'Basel ufe Bahnhof cho und mer sinn zämme mit em 1ner an d'Muschtermäss. Dört hämmer die Velousstellig "twoo" bsuecht. Ich bi no mit emene Frischluft Simpel mit Zahnradaatrieb e Rundi go fahre. Dä Simpel hett scho Drive gha und zum Schalte ischer au super gsi. Sicher emoll en Überlegig wärt, wenn mi alte Göppel emol dure groschtet wäri. Jo und denne hämmers bald scho gseh gha. Öppe zäh Ständ hett's gha und das inere riese Halle. Womer alles gseh hänn, simmer halt gange .....
Am Zwölfi simmer denne zrugg gsi und hänn bi dr Erika z'Mittag gässe. Denne isches ab wienes Zäpfli und mer sinn no bis öppe am fünfi an dr Rhynacher Fasnacht im Matsch und de Konfetti ummegstiegelet. Es hett au do meh Guggene als Cliquene gha und no es paar Wääge, wonis d'Waggis mir ihrne Orange, Confetti, Dääfi und Bliemli bombardiert hänn. Am halber Säggsi bini denne ufe Bus und derno uf's Tram umgstiege und es hett mer am Bahnhof grad no uf's Säggsi-Zügli für uf Chur glängt.
Z'Chur aacho, bini schnäll heim go s'Zügs ablade und wermer aazieh. Denn bini no bitz an d'Chuurer Fasnacht go de Guggene zuelose. Es hett no esone Schissdräggzügli vo Basler Drummler gha wo als Blauzungeschoof dur Chur gloffe sinn. Das hänn d'Churer aber nid verstande und sind sogar hässig worde. Im ene Egge hani au no e Basler Gugge aatroffe, D'Fährischiffli oder eso hänn sie gheisse. Ich bi denn no bitz witers zoge und ha no es paarne Gugge zueglost. Susch isch eifach es Mega Puff gsi und wenn die fremde Guggene nid wäre cho spiele, wär nid viel gloffe. Denn hättis wirklich nur es guets Grüppli gha und d'Fasnacht wär öppe innere Stund fertig gsi.
Do hani no zur Erinnerig die beide Fasnachtschlöis gknipst womer no hänn welle e Plaquette vrkhauffe :D
Aber das isch e lengeri Gschicht. Die vrzell ich denne es anders Mol ...
Übrigens hett sich mini Vrmuetig am Sunntig bestätigt. Denne hänn d'Churer nomol e Umzug gmacht und es hett genau drei Guggene gha, wo no es paar Lütt noche tschumplet sind. OK, zuegeh ! Als Basler bin ich in dere Hinsicht halt scho vrwöhnt, was Fasnacht anbelangt. D'Basler Fasnacht sind halt scho die drei scheenschte Dääg in der Wält :D