Was me an der HIGA nid alles astelle cha !

Hütt isch es kei schön Wätter gsi und ich ha nid gwüsst, was ich an somene rägnerische Tag mache sell. Also han ich beschlosse, an d'HIGA z'goh. Das isch sone Gewerbemäss in Chur, eigentlich eher für Lütt mit Gäld und Inträssi für neui Kuchi-Irichtige, Fänschter, Türe, renovierti Dächer, Umbaute, Aabaute, Hushaltsgrät, Whirlpool, Wintergärte, Swimmingpool-Überdachige und Wii. Vor allem Wii. Es hett sicher zäh Ständ mit Wii-Deguschtatione gha. Und dert sinn denne die meischte Lütt ghoggt. Bi dene andere Ständ sind eher ganz armi Ussteller mit miede Auge gstande und hänn sich d'Bei in Buuch gstande. Glangwiilti und enttüschti Gsichter, well alli eso desinteressiert witer gloffe sind. Nid emoll e fuule Spruch hänn si gheie loh. Bi eim Stand, wo eso renovierti Ziegel usgstellt gsi sind, bini e bitz am luege gsi, scho isch dr Stadnbsitzer cho froge, öb ich Inträsse heig. Ich hanen leider au miesse enttüsche, well ich jo kei eiges Huus ha und mis Dach nid renoviere will. Er isch denn ganz enttüscht gsi. Aso ich wünsch ihm au an dere Stell, dass er wenigschtens ei Uftrag überchunnt oder au meh. Eifach eso ane Mäss und die Standmieti zahle und nid emoll öppis verchauffe, das würd sogar mich deprimiere. Ich bi denne witers gloffe und bi schlussändlich ufere Bühni gstande, wo eine vo mir e Fotti gmacht hett und denne eso künschtlich ane Frau ane gschobe hett. Ich ha immer gschraue "nöcher an die Frau ane", aber er hett nid glost. Denn hani mer no e Autogramm vo dere Frau lo organisiere. Hejo, wenn i denn scho zur Beluschtigung vom Volk sell ane stoh, denn will ich au e Autogramm vom "Star". E nätte Herr hett mer denn das Autogramm organisiert bi dere Dame, wo grad in der Schminki gsässe isch. Jo denn bini witers gloffe und am Massagestand vone paar Japanierinne glandet. Eini hett mi grad iigspanne und mich mit eso Apparätli massiert. Ich has natürlich grad usgnützt und sie isch mit Fliss um mich umme tanzt und hett massiert. Fascht hätt sie mer no s'Portemonnaie use massiert, aber ich ha derzue gmeint, ich heig jetzt kei Stütz, was au gstumme hett. So bini denn dusse no bitz de Wurschtständ und hammer mit em letschte Batze no e Hemmberger Wurscht am Velostand bstellt und gässe. Denn bini no bitz in d'Stadt in's Cafe Arcas, woni no e paar alti Gsichter vo der deep gseh ha. Tja, Chur isch chlii .....